Námskeið í hlutverkaspilum
Námskeið fyrir börn og unglinga í
vinsæla hlutverkaspilinu Dungeons
& Dragons. Spilað er í litlum hópum
með dýflyssukennara vikulega eða
nokkra daga í senn.
Systkinaafsláttur og hægt að nýta frístundarkort á námskeiðin. Hentar bæði fyrir lengra komna og þá sem eru að læra inn á spilið.
Um námskeiðin
Hlutverkaspil eru frábær skemmtun, þroskandi og uppbyggileg leið til þess að eiga í samskiptum og tengjast félögum á skemmtilegan hátt. Á námskeiðinu er spilað í litlum í hópum með reyndum stjórnanda (Dýflyssumeistari) sem útskýrir reglurnar og hjálpar þátttakendum að búa til karakter sem þátttakendur nota í leiknum. Spilamennskan hefst um leið og karakterarnir eru tilbúnir og læra þátttakendur mest á því að spila. Námskeiðið hentar því bæði byrjendum og lengra komnum. Þátttakendur mega ávallt ráðfæra sig við dýflyssumeistarann, hvort sem spurningar snúa að spilinu eða öðru.
Við leggjum upp úr því að skapa jákvætt og afslappað andrúmsloft á hittingum. Leyfilegt er að standa upp og hreyfa sig á meðan spilað er og stundum finnst hópum gott að taka stutta pásu á spilahittingum. Leyfilegt er að snarla á meðan spilað er, svo vinsamlega upplýsið okkur strax ef þátttakandi er með ofnæmi. Leyfilegt er að koma með eigin teninga og fyrirfram útbúinn karakter sem þarfnast þó samþykkis Dýflyssumeistarans.
Til þess að spilahittingar gangi sem best þurfa þátttakendur að fylga einföldum reglum um að koma fram af virðingu og sýna hvoru öðru tillitsemi. Mikilvægt er að allir þátttakendur fái rými til þess að tjá sig og stýra sínum karakter. Æskilegt er að koma ekki með matvæli á hittinga sem lykta mikið og gæta að hreinlæti. Dýflyssumeistarar eru í góðum samskiptum við stjórnendur Nexus Noobs um hvernig hittingar ganga og geta foreldrar einnig haft samband við okkur með tölvupósti.
Reglurnar á námskeiðinu eru:
#1 Við komum vel fram hvert við annað og virðum mörk
#2 Við fylgjum reglum Dýflyssumeistarans
#3 Við geymum símana þangað til að hittingur er búinn (nema sé eitthvað sérstakt)
#4 Allan tímann er leyfilegt að standa upp og hreyfa sig eða snarla